 |
| سمك القد بالقشدة . مصدر الصورة : دينا منصور |
السلام عليكم. انا اسمى دينا منصور, عندى 27
سنة وبحضر ماجستير إدارة في جامعة بورتو من خلال منحة إراسمس.
مش هخبى عليكم, اول ما جالى إيميل القبول إنى
هروح البرتغال ضحكت! وقلت هو مش دى لغة بيتكلموها في البرازيل؟؟ وبعدين فتحت
الخريطة ودورت عليها وطلعت جنب اسبانيا.
يا ترى.. اروح ولا لأ؟ انا واحدة دارسة ف
امريكا ومعايا شهادات وخبرة ياما, اخرتها اعمل ماجستير في البرتغال؟! وبعد شوية
ضحكت تانى على تفاهتى وقصر نظرى. الجامعة مرتبة, والبرتغال اتحاد اوروبي برضه..
طيب وليه لأ! هخسر ايه يعنى ولو معجبنيش اعمل ماجستير غيره يعنى انا ورايا ايه!
المهم, رديت عل الإيميل وقبلت المنحة..
قرايبي ضحكوا عليا واصحابى رفعوا حواجبهم.. لكن ولا واحد فيهم سافر البلاد اللى
انا سافرتها ولا حتى خطي عتبة بورسعيد... براحتهم.. انا اللى هسافر واتفسح وادرس
واتبسط كمان.
كانت اول مرة اسافر فيها لما كان عندى 21 سنة. سافرت
امريكا سنة وخدت بكالريوس تانى. ورجعت مصر ودَرِست ف جامعة خاصة, وبعدين اشتغلت ف
سامسونج وسافرت اليونان عملت دبلومة امريكية في السياسة ورجعت اشتغلت مترجمة سنتين
. بعد كدة اتجوزت وسافرت امريكا تانى.. وبعدين جتلى المنحة و ادينى اهو.. مبسوطة
جدا في بلد محترمة ومنظمة ونضيفة. الناس بيتكلموا انجليزى وفرنساوى وبيساعدوا
القريب والغريب... طيبين وبيحبوا القهوة أوى والكورة والخروج والأكل كمان.
الأكل دا بقا حتتى.. انا هوايتى الأولى
والوحيدة هي الطبخ! حلمى انى افتح مطعم ف مصر للأكل الاجنبى من جميع انحاء العالم.
نفسى اعلم المصريين الاكل بتاع برة, عل الأقل طبق واحد من كل دولة. ايوة مطبخنا
عظيم وكل حاجة, بس احنا مقفولين جامد ومش بنتعود بسهولة عل الأكل الغريب. عندى 2
بلوج لطبخاتى بالوصفات والصور, وقبل ما اشيل الفيس بوك كنت عاملة صفحة للأكل بتاعى
بالوصفات برضه.
المهم, هحكيلكوا انهردة عن واحد من أهم
الأطباق في المطبخ البرتغالى (آه ولاهى طلع فيه مطبخ برتغالى ومشهور كمان.. يابويا
عل الجهل اللى الواحد كان فيه!)... الطبق اسمه "باكالوا كوم ناتش" أو
"سمك القد بالقشدة".
السمك دا بيعيش في المناطق المتجمدة وعادة
موجود في المحيط الهادىء والأطلنطى خصوصا في النرويج و كندا. السمكة دة بقا من نفس
عيلة سمكة الرنجة. من زمان لما اكتشفوها, كانوا بيسفروا بالسفن بالشهور وكان لازم
يشوفوا طريقة يحفظوا بيها الأكل. عشان كدة اخترعوا طريقة التجفيف من خلال الحفظ في
الملح. طبعا مش بتبقا فسيخ ولحمها يحمر! التمليح هنا مختلف تماما وبيحفظ اللحم
الأبيض للسمكة وكمان طعمة زى ما هم. على ما اعتقد ان البرتغال هى اكثر دولة بتاكلة
في العالم لو مكنتش الوحيدة, وحتى اللى بيروح يصطاد السمك من النرويج بيكون صيادين
برتغاليين.
المهم,
لغاية يومنا هذا لسه بيحفظوا السمكة في الملح لحفظ التقليد القديم, بيفطعوها نصين
بالعرض ويملحوها, وقبل ما ستات البيوت يطبخوها لازم تبات في المية ليلتين عشان
الملح الزايد يروح. طبعا السمك كمان بيتباع مجمد من غير تمليح او مجمد مملح او متقطع
مملح وكمان كل جزء من السمكة بيكون له سعر, دة غير ان سمك القد منه 25 فصيلة.
هحكيلكوا بقا تجربتى مع الطبق دة. عادة اول
شيء بعمله لما اسافر إنى بسال عن الأكلة المشهورة واتعلمها, دا شيء بيقربنى من
الثقافة وبيعملني فن الطبيخ اكتر وكمان بتعرف على مكونات واكل جديد مسمعتس عنه قبل
كدة, حتى لو المقادير مشهورة عندنا. عارفين ايه احلى حاجة في الطبيخ؟ ان ممكن ب 5
او 6 مقادير تعمل اكتر من 100 طبق بكمية لا متناهية من التباديل والتوافيق, ومع
الاستمتاع بطبخ الطبق والإبداع فيه ثم مشاركة الأكل مع الأحبة بيكون المطبخ والوقوف
فيه احلى اوقات حياتى (صدق أو لا تصدق).
كان اول شهر ليا في البرتغال, وسمعت كتير عن
الأكلة وكنت مشغولة في الدراسة والبحث عن شقة بدل السكن الجامعي فمعرفتش اروح اكله
بره, وأول ما نقلت شقة, قمت فتحت اليوتيوب زى الشاطرة ودورت على الطريقة
بالبرتغالى وعملتها.. ومن ساعتها وقعت ف حبه وحاليا بعرف اعملة بخمس طرق, لكن فيه
كتب كاملة في طريقة عمل ال"باكالاو" واهمهم كتاب "الف وصفة لعمل
الباكالاو" وطبعا بالبرتغالى, لكن متقلقوش, انا هنقلكوا المطبخ البرتغالى
واحدة واحدة بالعربى إن شاء الله.
انا طبعا عارفة ان السمك دا مش متوفر لكن هو
قريب شوية من سمك الرنجة وممكن الوصفة دى كمان تتعمل بسمك البربونى أو الساردين او
اى سمك له نكهة قوية ومميزة ويكون لحمه قاسى مش طرى. لكن طبعا الباكالاو حاجة
تانية.
المقادير:
-
400 جم سمك قد مقطع شرائح طولية مملحة
-
نصف لتر كريمة لبانى او قشدة بلدى ولبن (مقسوم إلى نصفين
متساويين)
-
4
حبات بطاطس كبيرة
-
ثوم وحبة بصل كبيرة
-
زيت زيتون
-
بقسماط وبيض
الوصفة:
-
ينقع السمك في ماء جاري لمدة 12 إلى 24 ساعة مع تغيير
المية ثلاث مرات على الأقل
-
نغير المية للمرة الأخيرة ونغلية لمدة 10 دقائق فقط
-
نشيل السمك بمعلقة المكرونة ونحطه على جنب, وبعدين نحط
البطاطس في نفس المية متقشرة ومتقطعة أرباع
-
نقطع البصل شرائح طويلة زى تقلية الكشرى ونهرس فصين ثوم
ونقليهم في نص كباية زيت زيتون, لو البرتغاليين معندهمش مية ممكن يشبروا زيت
الزيتون! بيعملوا بيه كل شيء في الدنيا.
-
نقلى على نار هادية
لغاية ما البصل يبقا دهبى وننزل عليه بالسمك. بالملعقة الخشب كدة نفرط السمك
عشان يبقا شرايط ارفع كمان بحيث تبقا شرائح البصل قد شرايط السمك في الحجم, وبعدين
نقلب كله على بعضة لغاية ما يتلخبطوا سوا.
-
عشرة دقائق وننزل بالنص الأول من الكريمة اللبانى ونرش
ملح وفلفل شطة وحبة كمون ونضبط الطعم. مننساش إن السمك أصلا مملح لكن الكريمة
والبصل لأ ,كمان السمكة ليها نكهة مميزة فناخد بالنا لحسن البهارات الكتير تغطى
على طعمها.
-
بعد كدة نحط ملعقتين كبار مليانين دقيق ونقلب كويس جدا 5
دقائق ونطفى النار.
-
بعد نضوج البطاطس تنقل في سلطانية عميقة ويضاف إليها
النصف الآخر من الكريمة اللبانى وبيضتين مضروبتين وملح وكمون وفصين ثوم مهروسين.
وتهمك البطاطس او تضرب في الخلاط مع باقى المكونات حتى تتجانس وتختلط جيدا
بالمكونات الأخرى.
-
هنجيب دلوقتى صينية فرن ونحط خليط السمك بالكريمة تحت
وفوقة خليط البطاطس.
-
نسيح معلقتين زبدة على الوش ونرش البقسماط وحبة بقدونس
مجفف لو موجود وتدخل فرن متوسط الحرارة لمدة 45 دقيقة حتى تعلو و تنضج, و آخر خمس
دقائق نفتح الشواية من فوق عشان تاخد وش دهبى وتقرمش.
-
تخرج من الفرن وتترك على الأقل ربع ساعة قبل التقديم
وبالهنا والشفا.
.png)
13:40
0
تعليق
